maine jo nam mohabbat se pukare sare

maiñ ne jo naam mohabbat se pukāre saare

ban ga.e vo mirī palkoñ ke sitāre saare

umr bhar kaun bhalā saath yahāñ chaltā hai

do qadam ke haiñ mirī jaan sahāre saare

kaun baiThegā yahāñ aur kise jaanā hai

jāntā huuñ tirī āñkhoñ ke ishāre saare

kaam ā.eñgī kisī roz ye merī ġhazleñ

paas rakhnā ye mire ġham ke shumāre saare

terī yādoñ meñ diyā hijr pe pahrā ham ne

jāgtī āñkhoñ se din-rāt guzāre saare

mere chandā ne idhar chhat meñ qadam kyā rakkhā

dekhne aa.e use chāñd sitāre saare

shab ga.e dasht meñ ik jashn bapā hotā hai

aa nikalte haiñ yahāñ dard ke maare saare

tum ne chhoḌī na agar sach kī parastish 'az.har'

chhoḌ jā.eñge tumheñ yaar tumhāre saare

main ne jo nam mohabbat se pukare sare

ban gae wo meri palkon ke sitare sare

umr bhar kaun bhala sath yahan chalta hai

do qadam ke hain meri jaan sahaare sare

kaun baiThega yahan aur kise jaana hai

jaanta hun teri aankhon ke ishaare sare

kaam aaengi kisi roz ye meri ghazlen

pas rakhna ye mere gham ke shumare sare

teri yaadon mein diya hijr pe pahra hum ne

jagti aankhon se din-raat guzare sare

mere chanda ne idhar chhat mein qadam kya rakkha

dekhne aae use chand sitare sare

shab gae dasht mein ek jashn bapa hota hai

aa nikalte hain yahan dard ke mare sare

tum ne chhoDi na agar sach ki parastish 'azhar'

chhoD jaenge tumhein yar tumhaare sare