maine lakh dekhe sitam magar ye tera sitam to ajib hai

maiñ ne laakh dekhe sitam magar ye tirā sitam to ajiib hai

kabhī paas ho ke bhī duur hai kabhī duur ho ke qarīb hai

maiñ bigaḌ gayā tirī ik nazar se vagarna mujh ko to dekh kar

ye galī kī aurteñ boltīñ ise dekho kaisā najīb hai

tū ho sāmne to bhī be-ḳhudī na ho sāmne to bhī dil jale

mire kis gunah kī sazā ye dī ki tapīdgī hī nasīb hai

tire sehr kā maiñ shikār ho ke tire qarīb jo aa gayā

to pata chalā ye mujhe ki tujh se jo duur hai vo labīb hai

ye duā bhī hai ki na vasl ho ye duā bhī hai ki na hijr ho

mire marz-e-dil kā sabab hai tū mire dil kā tū hī tabīb hai

kabhī be-ruḳh itnā ki ḳhaar ho kabhī multafit to nisār ho

tirī ye adā bhī habīb hai tirī vo adā bhī habīb hai

ye zamāna ahl-e-zamāna sab mujhe bhuul jaa.eñ gila nahīñ

tū na bhūlnā ki 'ma.āz' bhī tire mai-kade kā raqīb hai

main ne lakh dekhe sitam magar ye tera sitam to ajib hai

kabhi pas ho ke bhi dur hai kabhi dur ho ke qarib hai

main bigaD gaya teri ek nazar se wagarna mujh ko to dekh kar

ye gali ki aurten boltin ise dekho kaisa najib hai

tu ho samne to bhi be-KHudi na ho samne to bhi dil jale

mere kis gunah ki saza ye di ki tapidgi hi nasib hai

tere sehr ka main shikar ho ke tere qarib jo aa gaya

to pata chala ye mujhe ki tujh se jo dur hai wo labib hai

ye dua bhi hai ki na wasl ho ye dua bhi hai ki na hijr ho

mere marz-e-dil ka sabab hai tu mere dil ka tu hi tabib hai

kabhi be-ruKH itna ki KHar ho kabhi multafit to nisar ho

teri ye ada bhi habib hai teri wo ada bhi habib hai

ye zamana ahl-e-zamana sab mujhe bhul jaen gila nahin

tu na bhulna ki 'maaz' bhi tere mai-kade ka raqib hai