maine sirf apne nasheman ko sajaya sal bhar

maiñ ne sirf apne nasheman ko sajāyā saal bhar

fasl-e-gul bhī is liye aa.ī hai ab ke Daal bhar

bad-gumānī aa.ī to le jā.egī rishte tamām

dekhnā niklegī in shīshoñ kī hastī baal bhar

vo zamāna Thiik thā īmān laane ke liye

haidar-e-karrār bhar ḳhair aur shar dajjāl bhar

aaj merī arz par zulfeñ agar kholegā vo

kal hasad kī aag meñ jal jā.egā bañgāl bhar

kar diyā chāk-e-garebāñ ne tujhe bhī mo'atabar

chal divāne tū bhī ab jeb-e-junūñ meñ maal bhar

sajda bhar īmān baaqī rah gayā hai shaiḳh kā

aur aqīdat-e-barahman kī rah ga.ī hai thaal bhar

nek-o-bad kī kashmakash meñ haiñ kirāman-kātibīn

chal 'shujā' ab ḳhud hī apnā nāma-e-a.amāl bhar

main ne sirf apne nasheman ko sajaya sal bhar

fasl-e-gul bhi is liye aai hai ab ke Dal bhar

bad-gumani aai to le jaegi rishte tamam

dekhna niklegi in shishon ki hasti baal bhar

wo zamana Thik tha iman lane ke liye

haidar-e-karrar bhar KHair aur shar dajjal bhar

aaj meri arz par zulfen agar kholega wo

kal hasad ki aag mein jal jaega bangal bhar

kar diya chaak-e-gareban ne tujhe bhi mo'atabar

chal diwane tu bhi ab jeb-e-junun mein mal bhar

sajda bhar iman baqi rah gaya hai shaiKH ka

aur aqidat-e-barahman ki rah gai hai thaal bhar

nek-o-bad ki kashmakash mein hain kiraman-katibin

chal 'shuja' ab KHud hi apna nama-e-amal bhar