main rah-e-dar-o-rasan se guzar gaya kaise

maiñ rāh-e-dār-o-rasan se guzar gayā kaise

qubūl maslak-e-mansūr kar gayā kaise

tamām raat jo laḌtā rahā añdheroñ se

sahar kī pahlī kiran se vo Dar gayā kaise

vo shīsha-ḳhū thā na shīsha-badan na shīsha-ḳhayāl

to TūT-phūT ke āḳhir bikhar gayā kaise

chamak rahā thā jo shaffāf jhiil kī mānind

vo aaj andhe kueñ meñ utar gayā kaise

ubhar sakā na kabhī bahr-e-ġham meñ jo Duubā

huuñ maiñ ġharīq-e-ta'ajjub ubhar gayā kaise

huā hai shahr meñ kyā koī sāniha 'firdaus'

tumhārā chehra achānak utar gayā kaise

main rah-e-dar-o-rasan se guzar gaya kaise

qubul maslak-e-mansur kar gaya kaise

tamam raat jo laDta raha andheron se

sahar ki pahli kiran se wo Dar gaya kaise

wo shisha-KHu tha na shisha-badan na shisha-KHayal

to TuT-phuT ke aaKHir bikhar gaya kaise

chamak raha tha jo shaffaf jhil ki manind

wo aaj andhe kuen mein utar gaya kaise

ubhar saka na kabhi bahr-e-gham mein jo Duba

hun main ghariq-e-ta'ajjub ubhar gaya kaise

hua hai shahr mein kya koi saniha 'firdaus'

tumhaara chehra achanak utar gaya kaise