main raha shir-o-shakar talKHi-e-ayyam ke sath

maiñ rahā shīr-o-shakar talḳhī-e-ayyām ke saath

zindagī maiñ ne guzārī baḌe ārām ke saath

tamkanat bhī hai kuchh is meñ to ye ḳhud.dār bhī hai

chal sakegā na mirā dil ravish-e-ām ke saath

ab na shikve kī jagah hai na shikāyat kā maqām

ban ga.e ḳhud vo tamāshā mire anjām ke saath

aaj kī shaam sunā hai vo idhar ā.eñge

ab qayāmat na chalī aa.e kahīñ shaam ke saath

ġhair piite haiñ shab-o-roz tire hāthoñ se

ye ḳhalish aur bhī hai tishnagī-e-jām ke saath

jaag uThtī hai kabhī aur kabhī so jaatī hai

zindagī khel rahī hai sahar-o-shām ke saath

ye bhī shāyad tirā 'ejāz'-e-sitam-rānī hai

dil ko vāpas bhī kiyā tū ne to in.aam ke saath

main raha shir-o-shakar talKHi-e-ayyam ke sath

zindagi main ne guzari baDe aaram ke sath

tamkanat bhi hai kuchh is mein to ye KHuddar bhi hai

chal sakega na mera dil rawish-e-am ke sath

ab na shikwe ki jagah hai na shikayat ka maqam

ban gae KHud wo tamasha mere anjam ke sath

aaj ki sham suna hai wo idhar aaenge

ab qayamat na chali aae kahin sham ke sath

ghair pite hain shab-o-roz tere hathon se

ye KHalish aur bhi hai tishnagi-e-jam ke sath

jag uThti hai kabhi aur kabhi so jati hai

zindagi khel rahi hai sahar-o-sham ke sath

ye bhi shayad tera 'ejaz'-e-sitam-rani hai

dil ko wapas bhi kiya tu ne to inam ke sath