main rang-e-asman kar ke sunahri chhoD deta hun

maiñ rañg-e-āsmāñ kar ke sunahrī chhoḌ detā huuñ

vatan kī ḳhaak le kar ek muTThī chhoḌ detā huuñ

ye kyā kam hai ki haqq-e-ḳhud-parastī chhoḌ detā huuñ

tumhārā naam aatā hai to kursī chhoḌ detā huuñ

maiñ roz-e-jashn kī tafsīl likh kar rakh to letā huuñ

magar us jashn kī tārīḳh ḳhālī chhoḌ detā huuñ

bahut mushkil hai mujh se mai-parastī kaise chūTegī

magar haañ aaj se firqa-parastī chhoḌ detā huuñ

ḳhud apne haath se rasm-e-vidā.ī kar to dī par ab

koī bārāt aatī hai to bastī chhoḌ detā huuñ

tumhāre vasl kā jis din koī imkān hotā hai

maiñ us din roza rakhtā huuñ burā.ī chhoḌ detā huuñ

hukūmat mil ga.ī to un kā kūcha chhūT jā.egā

isī nuqte pe aa kar bādshāhī chhoḌ detā huuñ

mubārak ho tujhe sad-āfrīñ ai shān-e-mahrūmī

tire pahlū meñ aa ke ghar-grihastī chhoḌ detā huuñ

main rang-e-asman kar ke sunahri chhoD deta hun

watan ki KHak le kar ek muTThi chhoD deta hun

ye kya kam hai ki haqq-e-KHud-parasti chhoD deta hun

tumhaara nam aata hai to kursi chhoD deta hun

main roz-e-jashn ki tafsil likh kar rakh to leta hun

magar us jashn ki tariKH KHali chhoD deta hun

bahut mushkil hai mujh se mai-parasti kaise chuTegi

magar han aaj se firqa-parasti chhoD deta hun

KHud apne hath se rasm-e-widai kar to di par ab

koi baraat aati hai to basti chhoD deta hun

tumhaare wasl ka jis din koi imkan hota hai

main us din roza rakhta hun burai chhoD deta hun

hukumat mil gai to un ka kucha chhuT jaega

isi nuqte pe aa kar baadshahi chhoD deta hun

mubarak ho tujhe sad-afrin ai shan-e-mahrumi

tere pahlu mein aa ke ghar-grihasti chhoD deta hun