main rifaton ki anokhi misal hone laga

maiñ rif'atoñ kī anokhī misāl hone lagā

ye āsmāñ mire kāñdhoñ kī shaal hone lagā

fazā.eñ gītoñ kī furqat meñ bāñjh hone lagīñ

shajar gire to parindoñ kā kaal hone lagā

ghaḌī ghaḌī na.ī bātoñ kī khoj hone lagī

hamārā ahd mujassam-savāl hone lagā

varā-e-jism jo kuchh fāsle the miTne lage

dil is adā se sharīk-e-visāl hone lagā

nazar ke chāroñ taraf ratjagoñ kī baaḌh lagī

kisī se ḳhvāb meñ milnā muhāl hone lagā

maiñ chāhtā thā ki duniyā ko tere jaisā lagūñ

so tere qaul-o-'amal kī misāl hone lagā

zamāne bhar ke dukhoñ se rihā.ī milne lagī

tirī nazar kā koī yarġhamāl hone lagā

ise hamārī koī bad-du'ā lage na lage

ḳhud is nizām kā chalnā muhāl hone lagā

jo ahl-e-harf the kam kam hī rah ga.e 'yāvar'

hamāre shahr meñ qaht-ur-rijāl hone lagā

main rif'aton ki anokhi misal hone laga

ye aasman mere kandhon ki shaal hone laga

fazaen giton ki furqat mein banjh hone lagin

shajar gire to parindon ka kal hone laga

ghaDi ghaDi nai baaton ki khoj hone lagi

hamara ahd mujassam-sawal hone laga

wara-e-jism jo kuchh fasle the miTne lage

dil is ada se sharik-e-visal hone laga

nazar ke chaaron taraf ratjagon ki baDh lagi

kisi se KHwab mein milna muhaal hone laga

main chahta tha ki duniya ko tere jaisa lagun

so tere qaul-o-'amal ki misal hone laga

zamane bhar ke dukhon se rihai milne lagi

teri nazar ka koi yarghamal hone laga

ise hamari koi bad-du'a lage na lage

KHud is nizam ka chalna muhaal hone laga

jo ahl-e-harf the kam kam hi rah gae 'yawar'

hamare shahr mein qaht-ur-rijal hone laga