main sach to kah dun par usko kahin bura na lage

maiñ sach to kah duuñ par us ko kahīñ burā na lage

mire ḳhayāl kī yārab use havā na lage

ajiib tarz se ab ke nibhāyā ulfat ko

vafā jo kī hai to is tarah ki vafā na lage

darūn-e-zāt basā hai jahān yādoñ kā

vo duur rah ke bhī mujh ko kabhī judā na lage

kabhī to kahtā thā har lamha tere saath huuñ maiñ

ab aise bachhḌā ke us kā kahīñ patā na lage

tabīb tum ko bhulāne kā kar rahā hai ilaaj

maraz huā hai purānā koī davā na lage

tumhāre vāste jab jab baḌhāyā dast-e-talab

ajiib baat hai is dam duā duā na lage

uThe nazar se na us kī fusūn-e-parda-e-husn

ḳhatā bhī tujh se agar ho use ḳhatā na lage

ye terā tarz-e-bayāñ mashriqoñ sā hai 'asrā'

vo din na aa.e ke tujh ko ḳhudā ḳhudā na lage

main sach to kah dun par us ko kahin bura na lage

mere KHayal ki yarab use hawa na lage

ajib tarz se ab ke nibhaya ulfat ko

wafa jo ki hai to is tarah ki wafa na lage

darun-e-zat basa hai jahan yaadon ka

wo dur rah ke bhi mujh ko kabhi juda na lage

kabhi to kahta tha har lamha tere sath hun main

ab aise bachhDa ke us ka kahin pata na lage

tabib tum ko bhulane ka kar raha hai ilaj

maraz hua hai purana koi dawa na lage

tumhaare waste jab jab baDhaya dast-e-talab

ajib baat hai is dam dua dua na lage

uThe nazar se na us ki fusun-e-parda-e-husn

KHata bhi tujh se agar ho use KHata na lage

ye tera tarz-e-bayan mashriqon sa hai 'asra'

wo din na aae ke tujh ko KHuda KHuda na lage