main sanglaKH zaminon ke raaz kahta hun

maiñ sañglāḳh zamīnoñ ke raaz kahtā huuñ

maiñ giit ban ke chaTānoñ ke biich gūñjā huuñ

tulū-e-sub.h kā manzar ajiib hai kitnā

mirā ḳhayāl hai maiñ pahlī baar jaagā huuñ

mirā vajūd ġhanīmat hai sochiye to sahī

maiñ ḳhushk Daal kā pattā harā harā sā huuñ

bajā ki roz añdherā mujhe nigaltā hai

maiñ roz ik nayā ḳhurshīd ban ke uThtā huuñ

kisī ne baat hī samjhī na haal hī pūchhā

ajiib karb ke aalam meñ ghar se niklā huuñ

maiñ jāntā huuñ ki hai irtiqā kī kyā sūrat

maiñ aah ban ke uThā abr ban ke barsā huuñ

ajiib baat hai har samt rāste haiñ ravāñ

ajiib baat hai maiñ ghar kī raah bhūlā huuñ

mujhe talāsh kareñge na.ī rutoñ meñ log

maiñ gahrī dhund meñ lipTā huā jazīrā huuñ

is ik savāl ne rakkhā hai muddatoñ hairāñ

maiñ kis kā ruup huuñ maiñ 'rāz' kis kī chhāyā huuñ

main sanglaKH zaminon ke raaz kahta hun

main git ban ke chaTanon ke bich gunja hun

tulu-e-subh ka manzar ajib hai kitna

mera KHayal hai main pahli bar jaga hun

mera wajud ghanimat hai sochiye to sahi

main KHushk Dal ka patta hara hara sa hun

baja ki roz andhera mujhe nigalta hai

main roz ek naya KHurshid ban ke uThta hun

kisi ne baat hi samjhi na haal hi puchha

ajib karb ke aalam mein ghar se nikla hun

main jaanta hun ki hai irtiqa ki kya surat

main aah ban ke uTha abr ban ke barsa hun

ajib baat hai har samt raste hain rawan

ajib baat hai main ghar ki rah bhula hun

mujhe talash karenge nai ruton mein log

main gahri dhund mein lipTa hua jazira hun

is ek sawal ne rakkha hai muddaton hairan

main kis ka rup hun main 'raaz' kis ki chhaya hun