main sochta rahta hun dimaghon mein nahin jo

maiñ sochtā rahtā huuñ dimāġhoñ meñ nahīñ jo

hai kaun sā vo phuul ki bāġhoñ meñ nahīñ jo

hotī hai kisī dīda-e-namnāk kī lau se

vo raushnī kaisī hai charāġhoñ meñ nahīñ jo

dekho na mirā jism mirī ruuh jalī thī

ye daaġh hai vo jild ke dāġhoñ meñ nahīñ jo

paanī meñ zamīnoñ pe havā meñ use khojā

vo kaisā nishāñ hai ki surāġhoñ meñ nahīñ jo

ik kār-e-musalsal hai use chāhte rahnā

lutf is kā lagātār hai nāġhoñ meñ nahīñ jo

is mahfil-e-ahbāb kī sarshārī ajab hai

vo mai bhī chhalak jaa.e ayāġhoñ meñ nahīñ jo

rangat hī nahīñ āb-o-havā kā bhī asar hai

baguloñ meñ koī baat hai zāġhoñ meñ nahīñ jo

'nāsir' haiñ ajab boliyāñ tā.ūs-e-zamāñ kī

ashjār ke pur-ġhol kulāġhoñ meñ nahīñ jo

main sochta rahta hun dimaghon mein nahin jo

hai kaun sa wo phul ki baghon mein nahin jo

hoti hai kisi dida-e-namnak ki lau se

wo raushni kaisi hai charaghon mein nahin jo

dekho na mera jism meri ruh jali thi

ye dagh hai wo jild ke daghon mein nahin jo

pani mein zaminon pe hawa mein use khoja

wo kaisa nishan hai ki suraghon mein nahin jo

ek kar-e-musalsal hai use chahte rahna

lutf is ka lagatar hai naghon mein nahin jo

is mahfil-e-ahbab ki sarshaari ajab hai

wo mai bhi chhalak jae ayaghon mein nahin jo

rangat hi nahin aab-o-hawa ka bhi asar hai

bagulon mein koi baat hai zaghon mein nahin jo

'nasir' hain ajab boliyan taus-e-zaman ki

ashjar ke pur-ghol kulaghon mein nahin jo