main sochta tha ki wo zaKHm bhar gaya ki nahin

maiñ sochtā thā ki vo zaḳhm bhar gayā ki nahīñ

khulā darīcha dar aa.ī sabā kahā ki nahīñ

havā kā ruḳh to usī bām-o-dar kī jānib hai

pahuñch rahī hai vahāñ tak mirī sadā ki nahīñ

zabāñ pe kuchh na sahī sun ke merā hāl-e-tabāh

tire zamīr meñ ubhrī koī duā ki nahīñ

laboñ pe aaj sar-e-bazm aa ga.ī thī baat

magar vo terī nigāhoñ kī iltijā ki nahīñ

ḳhud apnā haal sunāte hijāb aatā hai

hai bazm meñ koī derīna āshnā ki nahīñ

abhī kuchh is se bhī nāzuk maqām ā.eñge

karūñ maiñ phir se kahānī kī ibtidā ki nahīñ

paḌho na ishq meñ 'ḳhurshīd' ham na kahte the

tumhīñ batāo ki jī kā ziyāñ huā ki nahīñ

main sochta tha ki wo zaKHm bhar gaya ki nahin

khula daricha dar aai saba kaha ki nahin

hawa ka ruKH to usi baam-o-dar ki jaanib hai

pahunch rahi hai wahan tak meri sada ki nahin

zaban pe kuchh na sahi sun ke mera haal-e-tabah

tere zamir mein ubhri koi dua ki nahin

labon pe aaj sar-e-bazm aa gai thi baat

magar wo teri nigahon ki iltija ki nahin

KHud apna haal sunate hijab aata hai

hai bazm mein koi derina aashna ki nahin

abhi kuchh is se bhi nazuk maqam aaenge

karun main phir se kahani ki ibtida ki nahin

paDho na ishq mein 'KHurshid' hum na kahte the

tumhin batao ki ji ka ziyan hua ki nahin