main teri nigah mein ek chaman tha

maiñ terī nigah meñ ik chaman thā

ye husn-e-nazar thā husn-e-zan thā

pakkā thā jo man kā ḳhasta-tan thā

vo qais kahāñ thā kohkan thā

maḳhmūr sī ho rahī thiiñ āñkheñ

ruj.hān-e-gunāh zau-fagan thā

duniyā maqtal banī thī aur dil

apne hī ḳhayāl meñ magan thā

ġham-ḳhāna ho ke rah gayā hai

vo lafz jo mābad-e-suḳhan thā

uḌtā phirtā ġhubār har-sū

ye dasht-e-ravāñ kabhī chaman thā

kahne ko to mar chukī thī ḳhvāhish

baaqī magar us kā bāñkpan thā

fankār the ham na the kafan-kash

zindoñ ke liye hamārā fan thā

kyā ruuh damak damak uThī thī

kundan sā ḳhayāl kā badan thā

go hoñT 'razā' ke sil ga.e the

ḳhāme kī zabāñ se naġhma-zan thā

main teri nigah mein ek chaman tha

ye husn-e-nazar tha husn-e-zan tha

pakka tha jo man ka KHasta-tan tha

wo qais kahan tha kohkan tha

maKHmur si ho rahi thin aankhen

rujhan-e-gunah zau-fagan tha

duniya maqtal bani thi aur dil

apne hi KHayal mein magan tha

gham-KHana ho ke rah gaya hai

wo lafz jo mabad-e-suKHan tha

uDta phirta ghubar har-su

ye dasht-e-rawan kabhi chaman tha

kahne ko to mar chuki thi KHwahish

baqi magar us ka bankpan tha

fankar the hum na the kafan-kash

zindon ke liye hamara fan tha

kya ruh damak damak uThi thi

kundan sa KHayal ka badan tha

go honT 'raza' ke sil gae the

KHame ki zaban se naghma-zan tha