main to jalta hi raha aah-o-buka ki surat

maiñ to jaltā hī rahā āh-o-bukā kī sūrat

terī ulfat bhī milī mujh ko sazā kī sūrat

maiñ vo ik dhuul ki Thahrī ho fazā meñ jaise

tū hai rangīn sī mahkī sī fazā kī sūrat

maiñ huuñ āvāz jo Takrā ke palaT aa.ī ho

tū hai mas.hūr sī koyal kī sadā kī sūrat

merī hastī to rahī zard ḳhizāoñ kī tarah

aur tū shoḳh rahā rang-e-hinā kī sūrat

maiñ huuñ aañsū jo abhī aañkh se chhalkā bhī nahīñ

tū ki baḳhshā gayā āñkhoñ ko jilā kī sūrat

maiñ huuñ bikhre hue TuuTe hue ḳhvāboñ jaisā

tū hai ḳhvāboñ kī sī maḳhmūr adā kī sūrat

maiñ simaT kar bhī vahī rahtā huuñ kirchī kirchī

tū ki paiham hī rahā husn-o-jafā kī sūrat

maiñ siyah-baḳht rahā ġham kī farāvānī se

tū gulābī hai hamesha se hayā kī sūrat

tīra-baḳhtī meñ huuñ maiñ shab ke añdhere kī tarah

tū ubharte hue sūraj kī ziyā kī sūrat

maiñ girāyā hī gayā harf-e-mukarrar kī tarah

tū uThāyā hī gayā dast-e-du'ā kī sūrat

maiñ huuñ ik shaḳhs ki hai 'aam kitāboñ jaisā

tū hai mash.hūr bahut bāñg-e-darā kī sūrat

maiñ ne 'zāhid' ye bahut der meñ pahchānā hai

ki maiñ huuñ kāñch kī chūḌī kī baqā kī sūrat

main to jalta hi raha aah-o-buka ki surat

teri ulfat bhi mili mujh ko saza ki surat

main wo ek dhul ki Thahri ho faza mein jaise

tu hai rangin si mahki si faza ki surat

main hun aawaz jo Takra ke palaT aai ho

tu hai mashur si koyal ki sada ki surat

meri hasti to rahi zard KHizaon ki tarah

aur tu shoKH raha rang-e-hina ki surat

main hun aansu jo abhi aankh se chhalka bhi nahin

tu ki baKHsha gaya aankhon ko jila ki surat

main hun bikhre hue TuTe hue KHwabon jaisa

tu hai KHwabon ki si maKHmur ada ki surat

main simaT kar bhi wahi rahta hun kirchi kirchi

tu ki paiham hi raha husn-o-jafa ki surat

main siyah-baKHt raha gham ki farawani se

tu gulabi hai hamesha se haya ki surat

tira-baKHti mein hun main shab ke andhere ki tarah

tu ubharte hue suraj ki ziya ki surat

main giraya hi gaya harf-e-mukarrar ki tarah

tu uThaya hi gaya dast-e-du'a ki surat

main hun ek shaKHs ki hai 'am kitabon jaisa

tu hai mashhur bahut bang-e-dara ki surat

main ne 'zahid' ye bahut der mein pahchana hai

ki main hun kanch ki chuDi ki baqa ki surat