main udas hun mere mehrban main udas hun

maiñ udaas huuñ mire mehrbāñ maiñ udaas huuñ

tū kahīñ nahīñ hai tū hai kahāñ maiñ udaas huuñ

mirā shahr-e-ḳhvāb to reza reza bikhar chukā

kahīñ kho ga.ī mirī kahkashāñ maiñ udaas huuñ

mujhe apne qadmoñ kī ḳhaak meñ hī panāh de

mere paas kuchh bhī nahīñ hai maañ maiñ udaas huuñ

ye jo jañg hai kisī aur vaqt pe Taal deñ

saf-e-dostāñ saf-e-dushmanāñ maiñ udaas huuñ

tumheñ umr bhar kā hai tajraba koī mashvara

koī mashvara ai shikastagāñ maiñ udaas huuñ

maiñ ajiib huuñ nahīñ muḳhtalif haañ ajiib huuñ

vahāñ saarā shahr hai ḳhush jahāñ maiñ udaas huuñ

main udas hun mere mehrban main udas hun

tu kahin nahin hai tu hai kahan main udas hun

mera shahr-e-KHwab to reza reza bikhar chuka

kahin kho gai meri kahkashan main udas hun

mujhe apne qadmon ki KHak mein hi panah de

mere pas kuchh bhi nahin hai man main udas hun

ye jo jang hai kisi aur waqt pe Tal den

saf-e-dostan saf-e-dushmanan main udas hun

tumhein umr bhar ka hai tajraba koi mashwara

koi mashwara ai shikastagan main udas hun

main ajib hun nahin muKHtalif han ajib hun

wahan sara shahr hai KHush jahan main udas hun