main uske wasl se jaga to silsila tha wahi

maiñ us ke vasl se jaagā to silsila thā vahī

ki hijr us kā thā vaisā hī marhala thā vahī

dukān-e-shīsha-garāñ bhī sajā.ī thī us ne

tamām shahr meñ patthar bhī bāñTtā thā vahī

mujhe gumān ke sab rāste usī ne diye

mire yaqīñ ke diye bhī jalā rahā thā vahī

visāl us kā baratnā thā hijr likhnā bhī

ki tez dhuup meñ bārish kā rāsta thā vahī

parinde dhuup kī shiddat se ghar ke āñgan meñ

palaT ke aa.e to dekhā ki mas.ala thā vahī

vo ik yaqīn se jaatā thā chhoḌ kar mujh ko

nibāhne kā magar dil meñ hausla thā vahī

na.e visāl ke mausam meñ jo badan bhīgā

hujūm-e-hijr meñ dekhā to jal rahā thā vahī

maiñ jis kī rāhoñ se vāpas palaTne vaalā thā

nazar uThā.ī to ik roz aa rahā thā vahī

maiñ apne ḳhvāboñ kī dastak se jaag uThā 'ādil'

bahut sī rāteñ thiiñ aur sab meñ rat-jagā thā vahī

main us ke wasl se jaga to silsila tha wahi

ki hijr us ka tha waisa hi marhala tha wahi

dukan-e-shisha-garan bhi sajai thi us ne

tamam shahr mein patthar bhi banTta tha wahi

mujhe guman ke sab raste usi ne diye

mere yaqin ke diye bhi jala raha tha wahi

visal us ka baratna tha hijr likhna bhi

ki tez dhup mein barish ka rasta tha wahi

parinde dhup ki shiddat se ghar ke aangan mein

palaT ke aae to dekha ki masala tha wahi

wo ek yaqin se jata tha chhoD kar mujh ko

nibahne ka magar dil mein hausla tha wahi

nae visal ke mausam mein jo badan bhiga

hujum-e-hijr mein dekha to jal raha tha wahi

main jis ki rahon se wapas palaTne wala tha

nazar uThai to ek roz aa raha tha wahi

main apne KHwabon ki dastak se jag uTha 'adil'

bahut si raaten thin aur sab mein rat-jaga tha wahi