main uski aankh mein wo mere dil ki sair mein tha

maiñ us kī aañkh meñ vo mere dil kī sair meñ thā

vo apne shahr meñ aur maiñ dayār-e-ġhair meñ thā

ham apne ghar se bahut duur jā ke lauT aa.e

kisī kī aañkh kā kāñTā hamāre pair meñ thā

milā to ashk-e-nadāmat kī tah meñ us kā surāġh

kisī ke dil meñ na ka.abe meñ thā na dair meñ thā

maiñ jāntā huuñ liyā jā rahā thā merā naam

maiñ dushmanoñ kī tarah us ke zikr-e-ḳhair meñ thā

na jaane kaise masā.il the apne rishtoñ meñ

sukūn sulh ke aalam meñ thā na bair meñ thā

ye aur baat ki vo sab se pahle Duub gayā

tumhārā 'tāj' bhī ḳhud-āgahī kī tair meñ thā

main us ki aankh mein wo mere dil ki sair mein tha

wo apne shahr mein aur main dayar-e-ghair mein tha

hum apne ghar se bahut dur ja ke lauT aae

kisi ki aankh ka kanTa hamare pair mein tha

mila to ashk-e-nadamat ki tah mein us ka suragh

kisi ke dil mein na kabe mein tha na dair mein tha

main jaanta hun liya ja raha tha mera nam

main dushmanon ki tarah us ke zikr-e-KHair mein tha

na jaane kaise masail the apne rishton mein

sukun sulh ke aalam mein tha na bair mein tha

ye aur baat ki wo sab se pahle Dub gaya

tumhaara 'taj' bhi KHud-agahi ki tair mein tha