main yun to nahin hai ki mohabbat mein nahin tha

maiñ yuuñ to nahīñ hai ki mohabbat meñ nahīñ thā

albatta kabhī itnī musībat meñ nahīñ thā

asbāb to paidā bhī hue the magar ab ke

us shoḳh se milnā mirī qismat meñ nahīñ thā

tai maiñ ne kiyā din kā safar jis kī havas meñ

dekhā to vahī raat ziyāfat meñ nahīñ thā

ik lahr thī ġhā.eb thī jo tūfān-e-havā se

ik lafz thā jo ḳhat kī 'ibārat meñ nahīñ thā

kaifiyyateñ saarī thiiñ faqat hijr tak us ke

maiñ sāmne aa kar kisī hālat meñ nahīñ thā

badle ga.e ehsās ke andāz hī ab ke

dariyā kā bayāñ dil kī hikāyat meñ nahīñ thā

be-rabt sā ik shor rahā shahr meñ kuchh din

maiñ thā bhī yahāñ par to haqīqat meñ nahīñ thā

laġhzish huī kuchh mujh se bhī tuġhyān-e-talab meñ

kuchh vo bhī 'zafar' apnī tabī'at meñ nahīñ thā

main yun to nahin hai ki mohabbat mein nahin tha

albatta kabhi itni musibat mein nahin tha

asbab to paida bhi hue the magar ab ke

us shoKH se milna meri qismat mein nahin tha

tai main ne kiya din ka safar jis ki hawas mein

dekha to wahi raat ziyafat mein nahin tha

ek lahr thi ghaeb thi jo tufan-e-hawa se

ek lafz tha jo KHat ki 'ibarat mein nahin tha

kaifiyyaten sari thin faqat hijr tak us ke

main samne aa kar kisi haalat mein nahin tha

badle gae ehsas ke andaz hi ab ke

dariya ka bayan dil ki hikayat mein nahin tha

be-rabt sa ek shor raha shahr mein kuchh din

main tha bhi yahan par to haqiqat mein nahin tha

laghzish hui kuchh mujh se bhi tughyan-e-talab mein

kuchh wo bhi 'zafar' apni tabi'at mein nahin tha