majal kis ki hai ai sitamgar sunae tujhko jo chaar baaten

majāl kis kī hai ai sitamgar sunā.e tujh ko jo chaar bāteñ

bhalā kiyā e.atibār tū ne hazār muñh haiñ hazār bāteñ

jo kaifiyat dekhnī hai zāhid to chal ke tū dekh mai-kade meñ

bahak bahak kar maze maze kī sunā.eñge bāda-ḳhvār bāteñ

fasāna-e-dard-o-ġham sunāyā to bole vo jhūTh boltā hai

sunī huī hai bahut kahānī na ham se aisī baghār bāteñ

abhī se hai kuchh udaas qāsid abhī se hai bad-havās qāsid

sañbhal sañbhal kar samajh samajh kar karegā kyā be-qarār bāteñ

tumhārī tahrīr meñ hai pahlū tumhārī taqrīr meñ hai jaadū

phañse na kis tarah dil hamārā jahāñ hoñ ye pechdār bāteñ

burī balā hai ye 'dāġh'-e-pur-fan tum is ko hargiz na muñh lagānā

vagarna Dhab par lagā hī legā sunīñ agar us kī chaar bāteñ

majal kis ki hai ai sitamgar sunae tujh ko jo chaar baaten

bhala kiya eatibar tu ne hazar munh hain hazar baaten

jo kaifiyat dekhni hai zahid to chal ke tu dekh mai-kade mein

bahak bahak kar maze maze ki sunaenge baada-KHwar baaten

fasana-e-dard-o-gham sunaya to bole wo jhuTh bolta hai

suni hui hai bahut kahani na hum se aisi baghaar baaten

abhi se hai kuchh udas qasid abhi se hai bad-hawas qasid

sanbhal sanbhal kar samajh samajh kar karega kya be-qarar baaten

tumhaari tahrir mein hai pahlu tumhaari taqrir mein hai jadu

phanse na kis tarah dil hamara jahan hon ye pechdar baaten

buri bala hai ye 'dagh'-e-pur-fan tum is ko hargiz na munh lagana

wagarna Dhab par laga hi lega sunin agar us ki chaar baaten