majma mere hisar mein sailaniyon ka hai

majma.a mire hisār meñ sailāniyoñ kā hai

jañgal huuñ merā farz nigahbāniyoñ kā hai

qatre gurez karne lage raushnā.ī ke

qissa kisī ke ḳhuun kī arzāniyoñ kā hai

ḳhush-rañg pairahan se badan to chamak uThe

lekin savāl ruuh kī tābāniyoñ kā hai

rone se aur lutf vafāoñ kā baḌh gayā

sab zā.iqa phaloñ meñ na.e pāniyoñ kā hai

sau bastiyāñ ujāḌiye dil ko na toḌiye

ye sañg-e-mohtaram ka.ī peshāniyoñ kā hai

mahfūz rah sakeñge safīne kahāñ talak

maujoñ meñ band-o-bast hī tuġhyāniyoñ kā hai

hotī haiñ dastiyāb baḌī mushkiloñ ke ba.ad

'shāhid' hayāt naam jin āsāniyoñ kā hai

majma mere hisar mein sailaniyon ka hai

jangal hun mera farz nigahbaniyon ka hai

qatre gurez karne lage raushnai ke

qissa kisi ke KHun ki arzaniyon ka hai

KHush-rang pairahan se badan to chamak uThe

lekin sawal ruh ki tabaniyon ka hai

rone se aur lutf wafaon ka baDh gaya

sab zaiqa phalon mein nae paniyon ka hai

sau bastiyan ujaDiye dil ko na toDiye

ye sang-e-mohtaram kai peshaniyon ka hai

mahfuz rah sakenge safine kahan talak

maujon mein band-o-bast hi tughyaniyon ka hai

hoti hain dastiyab baDi mushkilon ke baad

'shahid' hayat nam jin aasaniyon ka hai