majnun bana diya to mukammal bana diya

majnūñ banā diyā to mukammal banā diyā

mujh ko to mere ishq ne pāgal banā diyā

dil ne kisī kī yaad ko chhoḌā nahīñ kabhī

dil ne kisī kī yaad ko āñchal banā diyā

itnā maiñ terī yaad meñ barsī huuñ TuuT kar

āñkhoñ ko jaise maiñ ne to bādal banā diyā

logoñ kā ik hujūm thā jaane kidhar gayā

bastī ko kis ne raat meñ jangal banā diyā

koī to is jahāñ meñ hai nā-puḳhta aur ḳhaam

yā rab kisī ko tū ne mukammal banā diyā

koī to ilm-o-fikr meñ hai bahr-e-be-karāñ

insān koī tū ne to aj.hal banā diyā

'zebī' maiñ ḳhud ko sonā samajhtī thī aur bas

mujh ko kisī ne dekh lo pītal banā diyā

majnun bana diya to mukammal bana diya

mujh ko to mere ishq ne pagal bana diya

dil ne kisi ki yaad ko chhoDa nahin kabhi

dil ne kisi ki yaad ko aanchal bana diya

itna main teri yaad mein barsi hun TuT kar

aankhon ko jaise main ne to baadal bana diya

logon ka ek hujum tha jaane kidhar gaya

basti ko kis ne raat mein jangal bana diya

koi to is jahan mein hai na-puKHta aur KHam

ya rab kisi ko tu ne mukammal bana diya

koi to ilm-o-fikr mein hai bahr-e-be-karan

insan koi tu ne to ajhal bana diya

'zebi' main KHud ko sona samajhti thi aur bas

mujh ko kisi ne dekh lo pital bana diya