makan mera azal se DhunDhti phirti thi virani

makāñ merā azal se DhūñDhtī phirtī thī vīrānī

nihāyat shauq se kī dil ne ranj-o-ġham kī mehmānī

qarār us ko nahīñ miltā siñghār us kā nahīñ bantā

mire dil se tire gesū ne sīkhī hai pareshānī

ḳhatā-e-fāsh hai ham ne jafā ko kyuuñ jafā samjhā

qayāmat tak na jā.egī hamārī ye pashemānī

batā.eñ kyā tumhārī ik nahīñ se ham pe kyā guzrī

umīdeñ thiiñ hazāroñ haa.e jin par phir gayā paanī

adū ke qaul kī tum ne hamesha pāsdārī kī

hamārī baat lekin aaj tak ik bhī nahīñ maanī

nazar aatā hai āsāñ sab jise dushvār kahte haiñ

tarīq-e-ishq meñ har ek dushvārī hai āsānī

maza detā nahīñ 'hāfiz' ruḳh-o-gesū kā nazzāra

misāl-e-ā.īna jab tak na ho āñkhoñ meñ hairānī

makan mera azal se DhunDhti phirti thi virani

nihayat shauq se ki dil ne ranj-o-gham ki mehmani

qarar us ko nahin milta singhaar us ka nahin banta

mere dil se tere gesu ne sikhi hai pareshani

KHata-e-fash hai hum ne jafa ko kyun jafa samjha

qayamat tak na jaegi hamari ye pashemani

bataen kya tumhaari ek nahin se hum pe kya guzri

umiden thin hazaron hae jin par phir gaya pani

adu ke qaul ki tum ne hamesha pasdari ki

hamari baat lekin aaj tak ek bhi nahin mani

nazar aata hai aasan sab jise dushwar kahte hain

tariq-e-ishq mein har ek dushwari hai aasani

maza deta nahin 'hafiz' ruKH-o-gesu ka nazzara

misal-e-aina jab tak na ho aankhon mein hairani