makan milte hain kya la-makan nahin milta

makān milte haiñ kyā lā-makāñ nahīñ miltā

nishān laakh haiñ lekin nishāñ nahīñ miltā

kahīñ bhī jaa.eñ kahāñ āsmāñ nahīñ miltā

lahad hī ek jagah hai jahāñ nahīñ miltā

huī hai raushan usī se hamārī peshānī

jabīn-e-arsh ko jo āstāñ nahīñ miltā

sunī hai maiñ ne bhī rañgīñ-navā.ī-e-nāqūs

gale se mere ye vaqt-e-azāñ nahīñ miltā

ye chāhtā huuñ ki be-muñh ke ābloñ se nibhe

kahīñ bhī ḳhaar koī be-zabāñ nahīñ miltā

bahār aate hī phūloñ ne chhāvnī chhā.ī

ki DhūñDhtā huuñ mujhe āshiyāñ nahīñ miltā

ye kah rahā hai tarannum havā kī maujoñ kā

ḳhamosh phūloñ kā husn-e-bayāñ nahīñ miltā

ye shab guzār-e-haram hai zarūr ai saaqī

kisī se raat ko pīr-e-muġhāñ nahīñ miltā

chale na kaam bhare ḳhum agar na saath chaleñ

haram kī raah meñ kosoñ kuaañ nahīñ miltā

shafaq khulī na sar-e-qabr pā-e-rañgīñ se

zamīñ se jhuk ke kabhī āsmāñ nahīñ miltā

ḳhudā ke vāste pahuñchā de koī manzil tak

bichhaḌ gayā huuñ mujhe kārvāñ nahīñ miltā

zabān-e-hāl meñ in kī ajab latāfat hai

kisī se phūloñ kā husn-e-bayāñ nahīñ miltā

chale na haath gale par to ḳhud hī chal jaa.e

unheñ gilā hai ki ḳhanjar ravāñ nahīñ miltā

'riyāz' chhāñT liyā us ne mujh se būḌhe ko

koī bhī duḳhtar-e-raz ko javāñ nahīñ miltā

makan milte hain kya la-makan nahin milta

nishan lakh hain lekin nishan nahin milta

kahin bhi jaen kahan aasman nahin milta

lahad hi ek jagah hai jahan nahin milta

hui hai raushan usi se hamari peshani

jabin-e-arsh ko jo aastan nahin milta

suni hai main ne bhi rangin-nawai-e-naqus

gale se mere ye waqt-e-azan nahin milta

ye chahta hun ki be-munh ke aablon se nibhe

kahin bhi KHar koi be-zaban nahin milta

bahaar aate hi phulon ne chhawni chhai

ki DhunDhta hun mujhe aashiyan nahin milta

ye kah raha hai tarannum hawa ki maujon ka

KHamosh phulon ka husn-e-bayan nahin milta

ye shab guzar-e-haram hai zarur ai saqi

kisi se raat ko pir-e-mughan nahin milta

chale na kaam bhare KHum agar na sath chalen

haram ki rah mein koson kuan nahin milta

shafaq khuli na sar-e-qabr pa-e-rangin se

zamin se jhuk ke kabhi aasman nahin milta

KHuda ke waste pahuncha de koi manzil tak

bichhaD gaya hun mujhe karwan nahin milta

zaban-e-haal mein in ki ajab latafat hai

kisi se phulon ka husn-e-bayan nahin milta

chale na hath gale par to KHud hi chal jae

unhen gila hai ki KHanjar rawan nahin milta

'riyaz' chhanT liya us ne mujh se buDhe ko

koi bhi duKHtar-e-raz ko jawan nahin milta