malbus-e-ghubar yaad rakhna

malbūs-e-ġhubār yaad rakhnā

ye rāhguzār yaad rakhnā

ik shām-e-ḳhizāñ yahīñ kahīñ hai

ai sub.h-e-bahār yaad rakhnā

ham kashtī-e-ishq ke musāfir

utre nahīñ paar yaad rakhnā

ai zaḳhma-varān-e-barbat-e-dil

TuuTe hue taar yaad rakhnā

patjhaḌ kī havā.eñ chīḳhtī haiñ

kyā saut-e-hazār yaad rakhnā

ham jaate haiñ bār-e-ġham uThā.e

ai shahr-e-nigār yaad rakhnā

ibrat kā maqām hai ye duniyā

vīrān dayār yaad rakhnā

ai vādī-e-gul ko jaane vaale

rastoñ ke ye ḳhaar yaad rakhnā

miltī hai ġhamoñ se bhī basīrat

zaḳhmoñ kā shumār yaad rakhnā

bachpan ke makāñ kā naḳhl-e-hamrāz

ye haar siñghār yaad rakhnā

ye harf hai raushnī-e-fardā

harf sar-e-dār yaad rakhnā

shāyad maiñ ye ḳhvāb bhuul jā.ūñ

tum ai mire yaar yaad rakhnā

malbus-e-ghubar yaad rakhna

ye rahguzar yaad rakhna

ek sham-e-KHizan yahin kahin hai

ai subh-e-bahaar yaad rakhna

hum kashti-e-ishq ke musafir

utre nahin par yaad rakhna

ai zaKHma-waran-e-barbat-e-dil

TuTe hue tar yaad rakhna

patjhaD ki hawaen chiKHti hain

kya saut-e-hazar yaad rakhna

hum jate hain bar-e-gham uThae

ai shahr-e-nigar yaad rakhna

ibrat ka maqam hai ye duniya

viran dayar yaad rakhna

ai wadi-e-gul ko jaane wale

raston ke ye KHar yaad rakhna

milti hai ghamon se bhi basirat

zaKHmon ka shumar yaad rakhna

bachpan ke makan ka naKHl-e-hamraaz

ye haar singhaar yaad rakhna

ye harf hai raushni-e-farda

harf sar-e-dar yaad rakhna

shayad main ye KHwab bhul jaun

tum ai mere yar yaad rakhna