mansur-war mahw-e-tamasha nahin hun main

mansūr-vār mahv-e-tamāshā nahīñ huuñ maiñ

sab kuchh sahī ḳharāb-e-tamanna nahīñ huuñ maiñ

pinhāñ tajalliyāñ haiñ isī musht-e-ḳhāk meñ

har-chand kuchh nahīñ huuñ magar kyā nahīñ huuñ maiñ

socho to saare khel tamāshe mujhī se haiñ

samjho to koī khel-tamāshā nahīñ huuñ maiñ

hai dard-e-ishq-e-yār mujhe jaan se aziiz

saudā.ī-e-ilāj-e-masīhā nahīñ huuñ maiñ

kartā huuñ āzmā.ish-e-fariyād ai falak

yā tū nahīñ hai aaj kī shab yā nahīñ huuñ maiñ

hāsil tirī nigāh se hai kaif-e-be-ḳhudī

harf-e-talāsh sāġhar-o-mīnā nahīñ huuñ maiñ

zauq-e-suḳhan hai is liye likkhī ga.ī ġhazal

'ejāz' varna 'ġhālib'-o-'saudā' nahīñ huuñ maiñ

mansur-war mahw-e-tamasha nahin hun main

sab kuchh sahi KHarab-e-tamanna nahin hun main

pinhan tajalliyan hain isi musht-e-KHak mein

har-chand kuchh nahin hun magar kya nahin hun main

socho to sare khel tamashe mujhi se hain

samjho to koi khel-tamasha nahin hun main

hai dard-e-ishq-e-yar mujhe jaan se aziz

saudai-e-ilaj-e-masiha nahin hun main

karta hun aazmaish-e-fariyaad ai falak

ya tu nahin hai aaj ki shab ya nahin hun main

hasil teri nigah se hai kaif-e-be-KHudi

harf-e-talash saghar-o-mina nahin hun main

zauq-e-suKHan hai is liye likkhi gai ghazal

'ejaz' warna 'ghaalib'-o-'sauda' nahin hun main