manzar-e-subh dikhane use laya na gaya

manzar-e-sub.h dikhāne use laayā na gayā

aatī jaatī rahīñ shāmeñ koī aayā na gayā

raat bistar pe khule chāñd meñ sotā thā koī

maiñ ne chāhā ki jagā.ūñ to jagāyā na gayā

ek muddat use dekhā use chāhā lekin

vo kabhī paas se guzrā to bulāyā na gayā

ghere rahtī thī use ek jahāñ kī nazreñ

phir jo dekhā to vo us aan meñ paayā na gayā

sar uThāte hī kaḌī dhuup kī yalġhār huī

do qadam bhī kisī dīvār kā saayā na gayā

thā muqarrar ki mulāqāt rahegī us se

vo to pahuñchā thā magar mujh se hī aayā na gayā

manzar-e-subh dikhane use laya na gaya

aati jati rahin shamen koi aaya na gaya

raat bistar pe khule chand mein sota tha koi

main ne chaha ki jagaun to jagaya na gaya

ek muddat use dekha use chaha lekin

wo kabhi pas se guzra to bulaya na gaya

ghere rahti thi use ek jahan ki nazren

phir jo dekha to wo us aan mein paya na gaya

sar uThate hi kaDi dhup ki yalghaar hui

do qadam bhi kisi diwar ka saya na gaya

tha muqarrar ki mulaqat rahegi us se

wo to pahuncha tha magar mujh se hi aaya na gaya