manzar jhalakte chand ka kitna hasin tha

manzar jhalakte chāñd kā kitnā hasīn thā

us kī qabā kī tarah vo bādal mahīn thā

hairāñ hai mujh ko dekh ke kyuuñ TūTtā daraḳht

maiñ ug rahā huuñ ab ki maiñ zer-e-zamīn thā

ab khul gayā hai mujh se to had se guzar gayā

varna vo dekhne meñ to behad matīn thā

maiñ hosh-mand rah ke bhī nādān hī rahā

jazbāt meñ vo bah ke bhī kitnā zahīn thā

tujh ko rahā na apne zar-e-ġham kā e'timād

varna ye dil to dard-e-jahāñ kā amiin thā

'ārif' zabān us kī na detī thī dil kā saath

inkār kar ke aa.egā mujh ko yaqīn thā

manzar jhalakte chand ka kitna hasin tha

us ki qaba ki tarah wo baadal mahin tha

hairan hai mujh ko dekh ke kyun TuTta daraKHt

main ug raha hun ab ki main zer-e-zamin tha

ab khul gaya hai mujh se to had se guzar gaya

warna wo dekhne mein to behad matin tha

main hosh-mand rah ke bhi nadan hi raha

jazbaat mein wo bah ke bhi kitna zahin tha

tujh ko raha na apne zar-e-gham ka e'timad

warna ye dil to dard-e-jahan ka amin tha

'arif' zaban us ki na deti thi dil ka sath

inkar kar ke aaega mujh ko yaqin tha