manzil ka yun pata na sabhi ko bataiye

manzil kā yuuñ pata na sabhī ko batā.iye

jis par chale hoñ aap vo rasta dikhā.iye

ehsās kī zamīn pe ḳhushiyoñ ke rang hoñ

tasvīr jab banā.eñ mukammal banā.iye

kab tak udaas rah ke guzāreñge raat din

hañsnā agar muhāl hai to muskurā.iye

patthar pe ye likhā hai adāvat harām hai

ye baat bhī likhī hai mohabbat baḌhā.iye

gar dekhnā hai kitnā havāoñ meñ zor hai

ūñchī chhatoñ pe jā ke patañgeñ uḌā.iye

kyuuñ har kisī ko aap sunāte haiñ shā.erī

jo bhī suḳhan-shanās haiñ un ko sunā.iye

dil kā mizāj dekh ke dil par yaqīñ nahīñ

behtar hai aap ruuh se rishta nibhā.iye

maiñ ne to sāf-goī se kah dī hai apnī baat

ab jo nikālnā hai vo matlab nikāliye

manzil ka yun pata na sabhi ko bataiye

jis par chale hon aap wo rasta dikhaiye

ehsas ki zamin pe KHushiyon ke rang hon

taswir jab banaen mukammal banaiye

kab tak udas rah ke guzarenge raat din

hansna agar muhaal hai to muskuraiye

patthar pe ye likha hai adawat haram hai

ye baat bhi likhi hai mohabbat baDhaiye

gar dekhna hai kitna hawaon mein zor hai

unchi chhaton pe ja ke patangen uDaiye

kyun har kisi ko aap sunate hain shaeri

jo bhi suKHan-shanas hain un ko sunaiye

dil ka mizaj dekh ke dil par yaqin nahin

behtar hai aap ruh se rishta nibhaiye

main ne to saf-goi se kah di hai apni baat

ab jo nikalna hai wo matlab nikaliye