manzil na koi moD na rasta dikhai de

manzil na koī moḌ na rastā dikhā.ī de

aalam tamām dhuñd meñ lipTā dikhā.ī de

qātil dikhā.ī de na masīhā dikhā.ī de

har shaḳhs ik fareb-e-tamāshā dikhā.ī de

vaise to zindagī hai ujāloñ kā shahr bhī

dekho to maqbaroñ kā añdherā dikhā.ī de

jā.ūñ udhar to ek samundar hai be-karāñ

dekho idhar to pyaas kā sahrā dikhā.ī de

rañgīn hai qatl-e-gul se abhī dāman-e-bahār

dast-e-havas se ḳhuun Tapaktā dikhā.ī de

tahtush-shu.ūr meñ hai jo ik lamha-e-ḳhyāl

lafzoñ kī sīḌhiyoñ se utartā dikhā.ī de

suntā huuñ sā.atoñ meñ nigār-e-sahar kī chaap

manzar naqāb-e-shām ulaTtā dikhā.ī de

DhūñDo kisī hasīn ḳharābe meñ zindagī

ye dil to sādhūoñ kā baserā dikhā.ī de

arz-e-dakan meñ baat chalī hai kuchh is tarah

'sāqib' dayār-e-sher meñ tanhā dikhā.ī de

manzil na koi moD na rasta dikhai de

aalam tamam dhund mein lipTa dikhai de

qatil dikhai de na masiha dikhai de

har shaKHs ek fareb-e-tamasha dikhai de

waise to zindagi hai ujalon ka shahr bhi

dekho to maqbaron ka andhera dikhai de

jaun udhar to ek samundar hai be-karan

dekho idhar to pyas ka sahra dikhai de

rangin hai qatl-e-gul se abhi daman-e-bahaar

dast-e-hawas se KHun Tapakta dikhai de

tahtush-shuur mein hai jo ek lamha-e-KHyal

lafzon ki siDhiyon se utarta dikhai de

sunta hun saaton mein nigar-e-sahar ki chap

manzar naqab-e-sham ulaTta dikhai de

DhunDo kisi hasin KHarabe mein zindagi

ye dil to sadhuon ka basera dikhai de

arz-e-dakan mein baat chali hai kuchh is tarah

'saqib' dayar-e-sher mein tanha dikhai de