manzil nahin bandhi koi jada nahin bandha

manzil nahīñ bāñdhī koī jaada nahīñ bāñdhā

maiñ ne kahīñ jaane kā irāda nahīñ bāñdhā

maiñ dast-e-talab rakkhūñ kisī aur ke aage

itnā bhī zarūrat ko kushāda nahīñ bāñdhā

khultī hī chalī jaatī hai har shaḳhs kī gaThrī

achchhā hai ki dil had se ziyāda nahīñ bāñdhā

jitnā ki samajhtā hai tū aisā bhī nahīñ hai

bāñdhā hai magar itnā bhī saada nahīñ bāñdhā

tā'vīz-e-mohabbat hai ise pahn ke rakhnā

gardan meñ koī terī qilāda nahīñ bāñdhā

maiñ jāntā huuñ farq-e-shutur-gurba mire dost

asvār ke hamrāh piyāda nahīñ bāñdhā

ik baar idhar aa gayā to aa gayā 'kaunain'

ab vāpsī jaane kā irāda nahīñ bāñdhā

manzil nahin bandhi koi jada nahin bandha

main ne kahin jaane ka irada nahin bandha

main dast-e-talab rakkhun kisi aur ke aage

itna bhi zarurat ko kushada nahin bandha

khulti hi chali jati hai har shaKHs ki gaThri

achchha hai ki dil had se ziyaada nahin bandha

jitna ki samajhta hai tu aisa bhi nahin hai

bandha hai magar itna bhi sada nahin bandha

ta'wiz-e-mohabbat hai ise pahn ke rakhna

gardan mein koi teri qilada nahin bandha

main jaanta hun farq-e-shutur-gurba mere dost

aswar ke hamrah piyaada nahin bandha

ek bar idhar aa gaya to aa gaya 'kaunain'

ab wapsi jaane ka irada nahin bandha