manzil-o-samt-e-safar se be-KHabar na-ashna

manzil-o-samt-e-safar se be-ḳhabar nā-āshnā

ham-safar mujh ko milā kaisā safar nā-āshnā

saare hī chehre sabhī dīvār-o-dar nā-āshnā

lag rahā hai mujh ko saarā hī nagar nā-āshnā

sham.a ik nā-mahram-e-asrār-e-shab hañgām-e-shām

ik sitāra āḳhir-e-shab aur sahar nā-āshnā

mauj-e-tez-o-tund se aThkheliyāñ kartī huī

apne barg-o-bār se shāḳh-e-shajar nā-āshnā

ye to duniyā hai badaltī rahtī hai us kī nazar

jis qadar ye āshnā hai us qadar nā-āshnā

us nigāh-e-nāz ko apnī taraf samjhā kiye

munkashif phir ye huā ham the nazar nā-āshnā

kyā jhukegā ab kisī ke dar pe 'mohsin' apnā sar

zindagī bhar to rahā sajde se sar nā-āshnā

manzil-o-samt-e-safar se be-KHabar na-ashna

ham-safar mujh ko mila kaisa safar na-ashna

sare hi chehre sabhi diwar-o-dar na-ashna

lag raha hai mujh ko sara hi nagar na-ashna

shama ek na-mahram-e-asrar-e-shab hangam-e-sham

ek sitara aaKHir-e-shab aur sahar na-ashna

mauj-e-tez-o-tund se aThkheliyan karti hui

apne barg-o-bar se shaKH-e-shajar na-ashna

ye to duniya hai badalti rahti hai us ki nazar

jis qadar ye aashna hai us qadar na-ashna

us nigah-e-naz ko apni taraf samjha kiye

munkashif phir ye hua hum the nazar na-ashna

kya jhukega ab kisi ke dar pe 'mohsin' apna sar

zindagi bhar to raha sajde se sar na-ashna