manzil pahunch gaya hun main rasta kiye baghair

manzil pahuñch gayā huuñ maiñ rasta kiye baġhair

rusvā kiyā hai us ko tamāshā kiye baġhair

uupar se apnī pyaas bujhātā rahā huuñ maiñ

paanī piyā gilās ko jhūTā kiye baġhair

aatā hai is adā pe mujhe pyaar vo mirī

har baat maan letā hai ġhussa kiye baġhair

vo aisī raushnī hai ki jab bhī mujhe mile

khultī nahīñ hai mujh pe añdherā kiye baġhair

ik shaah baaj detā hai duuje ko vaise hī

vo merī dastaras meñ hai qabza kiye baġhair

us chor par nazar maiñ rakhūñ bhī to kis liye

jo haath aa gayā mire pīchhā kiye baġhair

ab dil kī raushnī hī karegī karishma kuchh

ḳhud ko ujālā karnā hai sho.ala kiye baġhair

manzil pahunch gaya hun main rasta kiye baghair

ruswa kiya hai us ko tamasha kiye baghair

upar se apni pyas bujhata raha hun main

pani piya gilas ko jhuTa kiye baghair

aata hai is ada pe mujhe pyar wo meri

har baat man leta hai ghussa kiye baghair

wo aisi raushni hai ki jab bhi mujhe mile

khulti nahin hai mujh pe andhera kiye baghair

ek shah baj deta hai duje ko waise hi

wo meri dastaras mein hai qabza kiye baghair

us chor par nazar main rakhun bhi to kis liye

jo hath aa gaya mere pichha kiye baghair

ab dil ki raushni hi karegi karishma kuchh

KHud ko ujala karna hai shoala kiye baghair