manzil pe pahunchne ko taron pe nazar rakhte

manzil pe pahuñchne ko tāroñ pe nazar rakhte

jab shahr basāyā thā rastoñ kī ḳhabar rakhte

kahte ho añdherā hai koī nahīñ chehra hai

īmān yaqīñ hotā āñkhoñ meñ sahar rakhte

ilzām-tarāshī se ab kuchh bhī nahīñ hāsil

jab aa.e ġhanīm andar laḌne kā hunar rakhte

is qaht-e-rijālāñ meñ qaa.id bhī nahīñ milte

jo qāfla-e-dil ko mā.il-ba-safar rakhte

ham ḳhaak ke zarroñ kī sūrat meñ pareshāñ haiñ

tāqat ko jam.a karte to barq-o-sharar rakhte

ham sab sag-e-māya haiñ haDDī pe jhapaTte haiñ

aise meñ kisī par kyā ab ḳhaak asar rakhte

sahrā kī tapish har sū kargas kā baserā hai

har shai jo jalā dī hai kuchh baaqī shajar rakhte

ik marg-e-musalsal hai afkār haiñ yaḳh-basta

sahrā kī harārat ko sho.aloñ sā jigar rakhte

manzil pe pahunchne ko taron pe nazar rakhte

jab shahr basaya tha raston ki KHabar rakhte

kahte ho andhera hai koi nahin chehra hai

iman yaqin hota aankhon mein sahar rakhte

ilzam-tarashi se ab kuchh bhi nahin hasil

jab aae ghanim andar laDne ka hunar rakhte

is qaht-e-rijalan mein qaid bhi nahin milte

jo qafla-e-dil ko mail-ba-safar rakhte

hum KHak ke zarron ki surat mein pareshan hain

taqat ko jama karte to barq-o-sharar rakhte

hum sab sag-e-maya hain haDDi pe jhapaTte hain

aise mein kisi par kya ab KHak asar rakhte

sahra ki tapish har su kargas ka basera hai

har shai jo jala di hai kuchh baqi shajar rakhte

ek marg-e-musalsal hai afkar hain yaKH-basta

sahra ki hararat ko shoalon sa jigar rakhte