manzil qarib rah bhi aasan ho Dar na ho

manzil qarīb raah bhī āsāñ ho Dar na ho

kyā lutf us safar meñ ki jo pur-ḳhatar na ho

maiñ bas ye chāhtā huuñ ki us kī nigāh meñ

koī bhī shaḳhs mere sivā mo'atabar na ho

maiñ huuñ siyāhī-e-shab-e-hijrāñ meñ pur-sukūñ

ai vaqt tham ḳhayāl rahe ab sahar na ho

ik samt bevafā.ī tirī ik taraf hai tū

dil kashmakash meñ hai ki kidhar ho kidhar na ho

terī duā ki tark-e-ta.alluq ho anqarīb

merī duā ki terī duā meñ asar na ho

daur-e-bahār jaa.e to phir zindagī bhī jaa.e

mere chaman se bād-e-ḳhizāñ kā guzar na ho

kyoñ zindagī maiñ nazr karūñ intizār ke

ho intizār-e-yār magar is qadar na ho

sīñchā hai is ko 'mīr' ne 'ġhālib' ne umr bhar

mumkin nahīñ zamīn-e-suḳhan bārvar na ho

'tanvīr' aur mashq-e-suḳhan kar na haar maan

ahl-e-suḳhan meñ ab bhī agar nāmvar na ho

manzil qarib rah bhi aasan ho Dar na ho

kya lutf us safar mein ki jo pur-KHatar na ho

main bas ye chahta hun ki us ki nigah mein

koi bhi shaKHs mere siwa mo'atabar na ho

main hun siyahi-e-shab-e-hijran mein pur-sukun

ai waqt tham KHayal rahe ab sahar na ho

ek samt bewafai teri ek taraf hai tu

dil kashmakash mein hai ki kidhar ho kidhar na ho

teri dua ki tark-e-talluq ho anqarib

meri dua ki teri dua mein asar na ho

daur-e-bahaar jae to phir zindagi bhi jae

mere chaman se baad-e-KHizan ka guzar na ho

kyon zindagi main nazr karun intizar ke

ho intizar-e-yar magar is qadar na ho

sincha hai is ko 'mir' ne 'ghaalib' ne umr bhar

mumkin nahin zamin-e-suKHan barwar na ho

'tanwir' aur mashq-e-suKHan kar na haar man

ahl-e-suKHan mein ab bhi agar namwar na ho