manzil se pahle hi chalna chhoD diya

manzil se pahle hī chalnā chhoḌ diyā

mujh ko us ne raah meñ tanhā chhoḌ diyā

pheñk dī us ne haath se jab talvār to phir

maiñ ne bhī dushman ko zinda chhoḌ diyā

murjhā.e murjhā.e se haiñ shāḳhoñ par

phūloñ ne kyoñ jaane khilnā chhoḌ diyā

daur-e-taraqqī tere sadqe chhoToñ ne

apne baḌoñ kī izzat karnā chhoḌ diyā

us dīpak ko kaun bujhāne vaalā hai

jis dīpak ko maiñ ne jaltā chhoḌ diyā

tab se hī to suukh gayā hai vo dariyā

jab se tum ne is meñ nahānā chhoḌ diyā

gardish hī to saath hamāre rahtī thī

gardish ne bhī saath hamārā chhoḌ diyā

ik ma.amūlī pinhāran kī chāhat meñ

shahzāde ne shahar-e-buḳhārā chhoḌ diyā

'ālam' jab se us ne nazreñ pherī haiñ

āñkhoñ ne bhī ḳhvāb sajānā chhoḌ diyā

manzil se pahle hi chalna chhoD diya

mujh ko us ne rah mein tanha chhoD diya

phenk di us ne hath se jab talwar to phir

main ne bhi dushman ko zinda chhoD diya

murjhae murjhae se hain shaKHon par

phulon ne kyon jaane khilna chhoD diya

daur-e-taraqqi tere sadqe chhoTon ne

apne baDon ki izzat karna chhoD diya

us dipak ko kaun bujhane wala hai

jis dipak ko main ne jalta chhoD diya

tab se hi to sukh gaya hai wo dariya

jab se tum ne is mein nahana chhoD diya

gardish hi to sath hamare rahti thi

gardish ne bhi sath hamara chhoD diya

ek mamuli pinhaaran ki chahat mein

shahzade ne shahar-e-buKHara chhoD diya

'alam' jab se us ne nazren pheri hain

aankhon ne bhi KHwab sajaana chhoD diya