manzur lahu ki bund koi ab tak na meri bekar giri

'manzūr' lahū kī buuñd koī ab tak na mirī bekār girī

yā rañg-e-hinā ban kar chamkī yā pesh-e-saīlb-o-dār girī

auroñ pe na jaane kyā guzrī is teġh-o-tabar ke mausam meñ

ham sar to bachā laa.e lekin dastār sar-e-bāzār girī

jo tiir andhere se the chale vo sarhad-e-jāñ ko chhū na sake

chaltā thā maiñ jis ke saa.e meñ gardan pe vahī talvār girī

kyā jāniye kaisī thī vo havā chauñkā na shajar patta na hilā

baiThā thā maiñ jis ke saa.e meñ 'manzūr' vahī dīvār girī

'manzur' lahu ki bund koi ab tak na meri bekar giri

ya rang-e-hina ban kar chamki ya pesh-e-sailb-o-dar giri

auron pe na jaane kya guzri is tegh-o-tabar ke mausam mein

hum sar to bacha lae lekin dastar sar-e-bazar giri

jo tir andhere se the chale wo sarhad-e-jaan ko chhu na sake

chalta tha main jis ke sae mein gardan pe wahi talwar giri

kya jaaniye kaisi thi wo hawa chaunka na shajar patta na hila

baiTha tha main jis ke sae mein 'manzur' wahi diwar giri