maqsad-e-husn hai kya chashm-e-basirat ke siwa

maqsad-e-husn hai kyā chashm-e-basīrat ke sivā

vaj.h-e-taḳhlīq-e-bashar kyā hai mohabbat ke sivā

ḳhūn-e-dil thūkte phirte haiñ jahāñ meñ shā.ir

kyā milā shahr-e-suḳhan meñ unheñ shohrat ke sivā

aaj bhī ilm-o-fan-o-sher-o-adab haiñ pāmāl

bā-kamāloñ ko milā kuchh na ihānat ke sivā

haath meñ jin ke ḳhushāmad kā hai gadlā kashkol

un ko e.azāz bhī mil jā.eñge izzat ke sivā

raat din rañj hai is baat kā sab ko ḳhāliq

arsa-e-hashr meñ kyā laa.eñ nadāmat ke sivā

ye mashīnoñ kī chakā-chauñd ye daur-e-ālāt

is meñ har chiiz muqaddar hai muravvat ke sivā

ġhota-zan ham rahe kasrat ke samundar meñ fuzūl

kaun ye pyaas bujhā.e tirī vahdat ke sivā

kyā zamāne meñ diyā tū ne aqīdat kā ma.aal

ham ko ranj-o-ġham-o-andoh-o-musībat ke sivā

ham jo apnā.eñ zamāne meñ tavakkul yārab

baab khul jā.eñge ham par tirī rahmat ke sivā

jab utartī hoñ sar-e-arsh se āyāt-e-junūñ

kaun ho ḳhāliq-e-ash.ār mashiyyat ke sivā

kitne hātim mile 'gulzār' zamāne meñ hameñ

vo ki har chiiz ke vāsif the saḳhāvat ke sivā

maqsad-e-husn hai kya chashm-e-basirat ke siwa

wajh-e-taKHliq-e-bashar kya hai mohabbat ke siwa

KHun-e-dil thukte phirte hain jahan mein shair

kya mila shahr-e-suKHan mein unhen shohrat ke siwa

aaj bhi ilm-o-fan-o-sher-o-adab hain pamal

ba-kamalon ko mila kuchh na ihanat ke siwa

hath mein jin ke KHushamad ka hai gadla kashkol

un ko eazaz bhi mil jaenge izzat ke siwa

raat din ranj hai is baat ka sab ko KHaliq

arsa-e-hashr mein kya laen nadamat ke siwa

ye mashinon ki chaka-chaund ye daur-e-alat

is mein har chiz muqaddar hai murawwat ke siwa

ghota-zan hum rahe kasrat ke samundar mein fuzul

kaun ye pyas bujhae teri wahdat ke siwa

kya zamane mein diya tu ne aqidat ka maal

hum ko ranj-o-gham-o-andoh-o-musibat ke siwa

hum jo apnaen zamane mein tawakkul yarab

bab khul jaenge hum par teri rahmat ke siwa

jab utarti hon sar-e-arsh se aayat-e-junun

kaun ho KHaliq-e-ashaar mashiyyat ke siwa

kitne hatim mile 'gulzar' zamane mein hamein

wo ki har chiz ke wasif the saKHawat ke siwa