mar gae kuchh maut se kuchh zindagi se mar gae

mar ga.e kuchh maut se kuchh zindagī se mar ga.e

aur kuchh jo bach ga.e vo ḳhud-kushī se mar ga.e

maut aisī chiiz hai jab dar pe aa.ī milne to

marne vaale jiite jiite ājizī se mar ga.e

kah rahe apnī zabānī muskurā ke chārāgar

chārasāz-e-zaḳhm-e-dil kī jo kamī se mar ga.e

kyā kareñ kis se shikāyat ham ke zāhid sab yahāñ

bebasī meñ the jiye aur bekasī se mar ga.e

maiñ ne to samjhāyā thā sab hai yahāñ ahl-e-jafā

dil lagāne ko chale the dil-lagī se mar ga.e

un ko dete the sadā.eñ chāroñ jānib bārhā

chup rahe vo aur ham bhī ḳhāmushī se mar ga.e

kuchh ko saaqī kī hai raġhbat aur kuchh ko e'tirāz

tauba tauba karne vaale mai-kashī se mar ga.e

jī rahe kitne divāne terī shoḳhī se sanam

ham to lekin bas tumhārī sādgī se mar ga.e

mar ga.e kitne hī jānāñ terī ik muskān par

aur jaanā kitne terī be-ruḳhī se mar ga.e

qāfiyoñ kī har ibārat un kī nazroñ ne likhī

un kī āñkheñ paḌhne vaale shā.irī se mar ga.e

raat kī tārīkiyoñ se kyā kareñ 'sādiq' gila

jugnuoñ kī bhiiḌ meñ ham raushnī se mar ga.e

mar gae kuchh maut se kuchh zindagi se mar gae

aur kuchh jo bach gae wo KHud-kushi se mar gae

maut aisi chiz hai jab dar pe aai milne to

marne wale jite jite aajizi se mar gae

kah rahe apni zabani muskura ke chaaragar

chaarasaz-e-zaKHm-e-dil ki jo kami se mar gae

kya karen kis se shikayat hum ke zahid sab yahan

bebasi mein the jiye aur bekasi se mar gae

main ne to samjhaya tha sab hai yahan ahl-e-jafa

dil lagane ko chale the dil-lagi se mar gae

un ko dete the sadaen chaaron jaanib barha

chup rahe wo aur hum bhi KHamushi se mar gae

kuchh ko saqi ki hai raghbat aur kuchh ko e'tiraaz

tauba tauba karne wale mai-kashi se mar gae

ji rahe kitne diwane teri shoKHi se sanam

hum to lekin bas tumhaari sadgi se mar gae

mar gae kitne hi jaanan teri ek muskan par

aur jaana kitne teri be-ruKHi se mar gae

qafiyon ki har ibarat un ki nazron ne likhi

un ki aankhen paDhne wale shairi se mar gae

raat ki tarikiyon se kya karen 'sadiq' gila

jugnuon ki bhiD mein hum raushni se mar gae