mar gae par bhi na ho bojh kisi par apna

mar ga.e par bhī na ho bojh kisī par apnā

ruuh ke saath huā ho tan-e-lāġhar apnā

be-tarah dil meñ bharā rahtā hai zulfoñ kā dhuāñ

dam nikal jaa.e kisī roz na ghuT kar apnā

yaar sotā nahīñ muñh kar ke hamārī jānib

kabhī karvaT nahīñ letā hai muqaddar apnā

tum jo do phuul chaḌhāo to ḳhushī ke maare

qabr khul jaa.e ye phūle tan-e-lāġhar apnā

intizām aap kī sarkār meñ yuuñ lāzim hai

band-o-bast aap kā ghar meñ rahe bāhar apnā

huur bhī tum ho nigāhoñ meñ parī bhī tum ho

ab to ai jaan dil aayā hai tumhīñ par apnā

nuur barsātī hai zulfoñ kī ghaTā chehre par

paañv us kūche meñ phislegā muqarrar apnā

niiñd furqat meñ kahāñ maut se aane vaalī

ghar se behtar hai jo takiye meñ ho bistar apnā

ḳhāna-barbād kyā ishq ne tiflī se hameñ

ki miTā baiThī gharauñde kī tarah ghar apnā

ab na kuchh bolte bantī hai na chup rahte hameñ

na dil apnā nazar aatā hai na dilbar apnā

va.ada-e-vasl agar aaj bhī puurā na huā

ye samajh lījiye va.ada hai barābar apnā

ḳhūb-rū kuchh bhī agar banda-navāzī farmā.eñ

māldāroñ ko kareñ banda-e-be-zar apnā

be galā kaaTe hue raat nahīñ kaTne kī

sadqa abrū kā diye jā.iye ḳhanjar apnā

Dor haiñ silk-e-guhar par kaheñ ash.ār ai 'bahr'

qadr-dāñ ho to sunā.eñ use jauhar apnā

mar gae par bhi na ho bojh kisi par apna

ruh ke sath hua ho tan-e-laghar apna

be-tarah dil mein bhara rahta hai zulfon ka dhuan

dam nikal jae kisi roz na ghuT kar apna

yar sota nahin munh kar ke hamari jaanib

kabhi karwaT nahin leta hai muqaddar apna

tum jo do phul chaDhao to KHushi ke mare

qabr khul jae ye phule tan-e-laghar apna

intizam aap ki sarkar mein yun lazim hai

band-o-bast aap ka ghar mein rahe bahar apna

hur bhi tum ho nigahon mein pari bhi tum ho

ab to ai jaan dil aaya hai tumhin par apna

nur barsati hai zulfon ki ghaTa chehre par

panw us kuche mein phislega muqarrar apna

nind furqat mein kahan maut se aane wali

ghar se behtar hai jo takiye mein ho bistar apna

KHana-barbaad kya ishq ne tifli se hamein

ki miTa baiThi gharaunde ki tarah ghar apna

ab na kuchh bolte banti hai na chup rahte hamein

na dil apna nazar aata hai na dilbar apna

wada-e-wasl agar aaj bhi pura na hua

ye samajh lijiye wada hai barabar apna

KHub-ru kuchh bhi agar banda-nawazi farmaen

maldaron ko karen banda-e-be-zar apna

be gala kaTe hue raat nahin kaTne ki

sadqa abru ka diye jaiye KHanjar apna

Dor hain silk-e-guhar par kahen ashaar ai 'bahr'

qadr-dan ho to sunaen use jauhar apna