mar jaane ki us dil mein tamanna bhi nahin hai

mar jaane kī us dil meñ tamannā bhī nahīñ hai

andar se koī kahtā hai jiinā bhī nahīñ hai

gul ho ga.iiñ sham.eñ zarā tum jaao havāo

shāḳhoñ pe koī TūTne vaalā bhī nahīñ hai

ai sañg sar-e-rāh malāmat se guzar jā

terā bhī nahīñ hai koī merā bhī nahīñ hai

ahbāb kī chāhat pe shub.h bhī nahīñ hotā

ham jaisā magar koī akelā bhī nahīñ hai

tū chhoḌ gayā hai to koī ġham na kareñge

is daur meñ insān ḳhudā kā bhī nahīñ hai

ye kyā ki ḳhayāloñ se uḌī jaatī hai ḳhushbū

maiñ ne to abhī tak use sochā bhī nahīñ hai

mar jaane ki us dil mein tamanna bhi nahin hai

andar se koi kahta hai jina bhi nahin hai

gul ho gain shamen zara tum jao hawao

shaKHon pe koi TuTne wala bhi nahin hai

ai sang sar-e-rah malamat se guzar ja

tera bhi nahin hai koi mera bhi nahin hai

ahbab ki chahat pe shubh bhi nahin hota

hum jaisa magar koi akela bhi nahin hai

tu chhoD gaya hai to koi gham na karenge

is daur mein insan KHuda ka bhi nahin hai

ye kya ki KHayalon se uDi jati hai KHushbu

main ne to abhi tak use socha bhi nahin hai