marhala did ka takrar tak aa pahuncha hai

marhala diid kā takrār tak aa pahuñchā hai

tuur se chal ke junūñ daar tak aa pahuñchā hai

baat aa pahuñchī hai andesha-e-rusvā.ī tak

jazba-e-dil lab-e-iz.hār tak aa pahuñchā hai

sho.ala-e-ishq jo raushan hai mire siine meñ

rang ban kar tire ruḳhsār tak aa pahuñchā hai

ehtiyātan tirī nazroñ ne chhupāyā thā jise

vo fasāna lab-e-aġhyār tak aa pahuñchā hai

ab nahīñ dil meñ tamanna kā nishāñ tak baaqī

aa.ina aks-e-ruḳh-e-yār tak aa pahuñchā hai

sham.a ne le liyā āġhosh meñ parvāne ko

jab ye dekhā mire me.aar tak aa pahuñchā hai

un kī sarshār nigāhoñ kā tasavvur jaise

mai-kada ḳhud lab-e-mai-ḳhvār tak aa pahuñchā hai

mutma.in vus.at-e-dāmān-e-lahad meñ hai 'tufail'

rāh-rau jaise dar-e-yār tak aa pahuñchā hai

marhala did ka takrar tak aa pahuncha hai

tur se chal ke junun dar tak aa pahuncha hai

baat aa pahunchi hai andesha-e-ruswai tak

jazba-e-dil lab-e-izhaar tak aa pahuncha hai

shoala-e-ishq jo raushan hai mere sine mein

rang ban kar tere ruKHsar tak aa pahuncha hai

ehtiyatan teri nazron ne chhupaya tha jise

wo fasana lab-e-aghyar tak aa pahuncha hai

ab nahin dil mein tamanna ka nishan tak baqi

aaina aks-e-ruKH-e-yar tak aa pahuncha hai

shama ne le liya aaghosh mein parwane ko

jab ye dekha mere mear tak aa pahuncha hai

un ki sarshaar nigahon ka tasawwur jaise

mai-kada KHud lab-e-mai-KHwar tak aa pahuncha hai

mutmain wusat-e-daman-e-lahad mein hai 'tufail'

rah-rau jaise dar-e-yar tak aa pahuncha hai