marhale jis mein bahut hashr-nishan guzre hain

marhale jis meñ bahut hashr-nishāñ guzre haiñ

us rah-e-shauq se ham raqs-kunāñ guzre haiñ

jin maqāmāt-e-junūñ se thā guzarnā mushkil

ham unhī se sifat-e-sail-e-ravāñ guzre haiñ

ye damakte hue zarrāt pata dete haiñ

is taraf se vo kabhī nūr-fishāñ guzre haiñ

jo bhī guzre haiñ tirī yaad se ġhāfil rah kar

zindagī meñ vahī lamhāt garāñ guzre haiñ

tishnagī zauq-e-nazāra kī vahī hai ki jo thī

yuuñ nazar se ka.ī rangīn samāñ guzre haiñ

'manshā' apnā hī jigar hai ki rah-e-zīst se yuuñ

be-hijābāna ba-sad azm-e-javāñ guzre haiñ

marhale jis mein bahut hashr-nishan guzre hain

us rah-e-shauq se hum raqs-kunan guzre hain

jin maqamat-e-junun se tha guzarna mushkil

hum unhi se sifat-e-sail-e-rawan guzre hain

ye damakte hue zarraat pata dete hain

is taraf se wo kabhi nur-fishan guzre hain

jo bhi guzre hain teri yaad se ghafil rah kar

zindagi mein wahi lamhat garan guzre hain

tishnagi zauq-e-nazara ki wahi hai ki jo thi

yun nazar se kai rangin saman guzre hain

'mansha' apna hi jigar hai ki rah-e-zist se yun

be-hijabana ba-sad azm-e-jawan guzre hain