mariz-e-hijr ko sehat se ab to kaam nahin

marīz-e-hijr ko sehat se ab to kaam nahīñ

agarche sub.h ko ye bach gayā to shaam nahīñ

rakho yā na rakho marham us pe ham samjhe

hamāre zaḳhm-e-judā.ī ko iltiyām nahīñ

jigar kahīñ hai kahīñ dil kahīñ haiñ hosh o havās

faqat judā.ī meñ is ghar kā intizām nahīñ

koī to vahshī hai kahtā koī hai dīvāna

butoñ ke ishq meñ apnā kuchh ek naam nahīñ

sahar jahāñ huī phir shaam vaañ nahīñ hotī

basān-e-umr-e-ravāñ apnā ik maqām nahīñ

kiyā jo vāda-e-shab us ne din pahāḌ huā

ye dekhiyo mirī shāmat ki hotī shaam nahīñ

vahī uThā.e mujhe jis ne mujh ko qatl kiyā

ki behtar is se mire ḳhuuñ kā intiqām nahīñ

uThāyā dāġh-e-gul afsos tum ne dil pe 'surūr'

maiñ tum se kahtā thā gulshan ko kuchh qayām nahīñ

mariz-e-hijr ko sehat se ab to kaam nahin

agarche subh ko ye bach gaya to sham nahin

rakho ya na rakho marham us pe hum samjhe

hamare zaKHm-e-judai ko iltiyam nahin

jigar kahin hai kahin dil kahin hain hosh o hawas

faqat judai mein is ghar ka intizam nahin

koi to wahshi hai kahta koi hai diwana

buton ke ishq mein apna kuchh ek nam nahin

sahar jahan hui phir sham wan nahin hoti

basan-e-umr-e-rawan apna ek maqam nahin

kiya jo wada-e-shab us ne din pahaD hua

ye dekhiyo meri shamat ki hoti sham nahin

wahi uThae mujhe jis ne mujh ko qatl kiya

ki behtar is se mere KHun ka intiqam nahin

uThaya dagh-e-gul afsos tum ne dil pe 'surur'

main tum se kahta tha gulshan ko kuchh qayam nahin