marmarin chand ki lau machalti rahi raat Dhalti rahi

marmarīñ chāñd kī lau machaltī rahī raat Dhaltī rahī

dil bahaltā rahā jaañ sañbhaltī rahī raat Dhaltī rahī

ham musāfir the aur thī sharīk-e-safar ik havā-e-ḳhunuk

bastiyoñ meñ kahīñ aag jaltī rahī raat Dhaltī rahī

shahr-e-imkān meñ maiñ tire dhyān meñ jis taraf bhī gayā

ajnabī dhun mire saath chaltī rahī raat Dhaltī rahī

sāhil-e-yād par maiñ rahā jāgtā so sakā bhī to kyā

be-sukūñ lahr karvaT badaltī rahī raat Dhaltī rahī

'umr ke taaq meñ ik darīcha khulā raushnī se dhulā

sham-e-ehsās kuchh pal pighaltī rahī raat Dhaltī rahī

shāḳh-e-gul par kahīñ os paḌtī rahī āñsuoñ kī tarah

os paḌtī rahī shāḳh jaltī rahī raat Dhaltī rahī

shab sitāra thī lekin dhuāñ ho ga.ī be-amāñ ho ga.ī

muntazir aañkh meñ niiñd Taltī rahī raat Dhaltī rahī

kis ishāre pe raqqāsa-e-zindagī pā-ba-jaulāñ huī

raqs kartī rahī ḳhuuñ ugaltī rahī raat Dhaltī rahī

dhīre dhīre 'kafīl' āḳhirash kaT gayā rāsta rat-jagā

yūñhī chaltā rahā raat Dhaltī rahī raat Dhaltī rahī

marmarin chand ki lau machalti rahi raat Dhalti rahi

dil bahalta raha jaan sanbhalti rahi raat Dhalti rahi

hum musafir the aur thi sharik-e-safar ek hawa-e-KHunuk

bastiyon mein kahin aag jalti rahi raat Dhalti rahi

shahr-e-imkan mein main tere dhyan mein jis taraf bhi gaya

ajnabi dhun mere sath chalti rahi raat Dhalti rahi

sahil-e-yaad par main raha jagta so saka bhi to kya

be-sukun lahr karwaT badalti rahi raat Dhalti rahi

'umr ke taq mein ek daricha khula raushni se dhula

sham-e-ehsas kuchh pal pighalti rahi raat Dhalti rahi

shaKH-e-gul par kahin os paDti rahi aansuon ki tarah

os paDti rahi shaKH jalti rahi raat Dhalti rahi

shab sitara thi lekin dhuan ho gai be-aman ho gai

muntazir aankh mein nind Talti rahi raat Dhalti rahi

kis ishaare pe raqqasa-e-zindagi pa-ba-jaulan hui

raqs karti rahi KHun ugalti rahi raat Dhalti rahi

dhire dhire 'kafil' aaKHirash kaT gaya rasta rat-jaga

yunhi chalta raha raat Dhalti rahi raat Dhalti rahi