marte hue wajud ki hasrat tamam-shud

marte hue vajūd kī hasrat tamām-shud

sāñsoñ se lipTī āḳhirī chāhat tamām-shud

dast-e-qazā baḌhā hai mirī samt alvidā.a

ai etikāf-e-ishq ibādat tamām-shud

saaqī tumhāre madh-bhare hoñToñ kā shukriya

bāda-kashī kī saarī halāvat tamām-shud

TuuTī hai aaj saañs kī Dorī to yuuñ huā

an-dekhī manziloñ kī masāfat tamām-shud

bujhte hue charāġh kī sūrat havā huuñ maiñ

ik ḳhūb-rū vajūd kī tāqat tamām-shud

ai bārgāh-e-husn koī faisla to kar

is nā-murād-e-ishq kī hujjat tamām-shud

'arshad' mujhe to ġhaib se aatī hai ab sadā

ibn-e-turāb ab tirī mohlat tamām-shud

marte hue wajud ki hasrat tamam-shud

sanson se lipTi aaKHiri chahat tamam-shud

dast-e-qaza baDha hai meri samt alwidaa

ai etikaf-e-ishq ibaadat tamam-shud

saqi tumhaare madh-bhare honTon ka shukriya

baada-kashi ki sari halawat tamam-shud

TuTi hai aaj sans ki Dori to yun hua

an-dekhi manzilon ki masafat tamam-shud

bujhte hue charagh ki surat hawa hun main

ek KHub-ru wajud ki taqat tamam-shud

ai bargah-e-husn koi faisla to kar

is na-murad-e-ishq ki hujjat tamam-shud

'arshad' mujhe to ghaib se aati hai ab sada

ibn-e-turab ab teri mohlat tamam-shud