marun to main kisi chehre mein rang bhar jaun

marūñ to maiñ kisī chehre meñ rang bhar jā.ūñ

'nadīm' kaash yahī ek kaam kar jā.ūñ

ye dasht-e-tark-e-mohabbat ye tere qurb kī pyaas

jo izn ho to tirī yaad se guzar jā.ūñ

mirā vajūd mirī ruuh ko pukārtā hai

tirī taraf bhī chalūñ to Thahar Thahar jā.ūñ

tire jamāl kā partav hai sab hasīnoñ par

kahāñ kahāñ tujhe DhūñDūñ kidhar kidhar jā.ūñ

maiñ zinda thā ki tirā intizār ḳhatm na ho

jo tū milā hai to ab sochtā huuñ mar jā.ūñ

tire sivā koī shā.ista-e-vafā bhī to ho

maiñ tere dar se jo uTThūñ to kis ke ghar jā.ūñ

ye sochtā huuñ ki maiñ but-parast kyuuñ na huā

tujhe qarīb jo pā.ūñ to ḳhud se Dar jā.ūñ

kisī chaman meñ bas is ḳhauf se guzar na huā

kisī kalī pe na bhūle se paañv dhar jā.ūñ

ye jī meñ aatī hai taḳhlīq-e-fan ke lamhoñ meñ

ki ḳhuun ban ke rag-e-sañg meñ utar jā.ūñ

marun to main kisi chehre mein rang bhar jaun

'nadim' kash yahi ek kaam kar jaun

ye dasht-e-tark-e-mohabbat ye tere qurb ki pyas

jo izn ho to teri yaad se guzar jaun

mera wajud meri ruh ko pukarta hai

teri taraf bhi chalun to Thahar Thahar jaun

tere jamal ka partaw hai sab hasinon par

kahan kahan tujhe DhunDun kidhar kidhar jaun

main zinda tha ki tera intizar KHatm na ho

jo tu mila hai to ab sochta hun mar jaun

tere siwa koi shaista-e-wafa bhi to ho

main tere dar se jo uTThun to kis ke ghar jaun

ye sochta hun ki main but-parast kyun na hua

tujhe qarib jo paun to KHud se Dar jaun

kisi chaman mein bas is KHauf se guzar na hua

kisi kali pe na bhule se panw dhar jaun

ye ji mein aati hai taKHliq-e-fan ke lamhon mein

ki KHun ban ke rag-e-sang mein utar jaun