masala usne bana kar jo uThaya hai mujhe

mas.ala us ne banā kar jo uThāyā hai mujhe

huuñ maiñ is dahr meñ muzhda ye sunāyā hai mujhe

rū-ba-rū mere vo phir DhūñD ke laayā hai mujhe

phir mire vahm ne ā.īna dikhāyā hai mujhe

hai tirā shahr bahut duur magar lagtā hai

har sahar ne vahīñ jaagā huā paayā hai mujhe

terā har ġham mujhe ḳhushiyoñ se bhī baḌh kar hai ‘azīz

har nayā ġham tirī dīvār kā saayā hai mujhe

besh-qīmat huuñ bahut apne harīfoñ ke liye

mere yāroñ ne magar muft meñ paayā hai mujhe

jis ke hāthoñ se huī thī mirī tā'mīr kabhī

almiya ye hai ki ḳhud us ne hī Dhāyā hai mujhe

jā-ba-jā likkhā huā huuñ sar-e-sāhil 'pāshī'

jā-ba-jā tund havāoñ ne miTāyā hai mujhe

masala us ne bana kar jo uThaya hai mujhe

hun main is dahr mein muzhda ye sunaya hai mujhe

ru-ba-ru mere wo phir DhunD ke laya hai mujhe

phir mere wahm ne aaina dikhaya hai mujhe

hai tera shahr bahut dur magar lagta hai

har sahar ne wahin jaga hua paya hai mujhe

tera har gham mujhe KHushiyon se bhi baDh kar hai ‘aziz

har naya gham teri diwar ka saya hai mujhe

besh-qimat hun bahut apne harifon ke liye

mere yaron ne magar muft mein paya hai mujhe

jis ke hathon se hui thi meri ta'mir kabhi

almiya ye hai ki KHud us ne hi Dhaya hai mujhe

ja-ba-ja likkha hua hun sar-e-sahil 'pashi'

ja-ba-ja tund hawaon ne miTaya hai mujhe