mashaqqat ka KHazana mangta hai

mashaqqat kā ḳhazāna māñgtā hai

mirī mehnat zamāna māñgtā hai

har ik lamha dil-e-āvāra-fitrat

masāfat kā ḳhazāna māñgtā hai

muqaddar se jise māñgā thā maiñ ne

use mujh se zamāna māñgtā hai

ajab pāgal hai mere man kā panchhī

qafas meñ āshiyāna māñgtā hai

hameñ har aan āmād-e-hijrat

hamārā āb-o-dāna māñgtā hai

sitam ye hai ki ham tishna-laboñ se

sitamgar ābyāna māñgtā hai

hamāre shahr kā mard-e-subuk-sar

kulāh-e-ḳhusravāna māñgtā hai

mirā har ik munāfiq yaar mujh se

ḳhulūs-e-dostāna māñgtā he

mashaqqat ka KHazana mangta hai

meri mehnat zamana mangta hai

har ek lamha dil-e-awara-fitrat

masafat ka KHazana mangta hai

muqaddar se jise manga tha main ne

use mujh se zamana mangta hai

ajab pagal hai mere man ka panchhi

qafas mein aashiyana mangta hai

hamein har aan aamad-e-hijrat

hamara aab-o-dana mangta hai

sitam ye hai ki hum tishna-labon se

sitamgar aabyana mangta hai

hamare shahr ka mard-e-subuk-sar

kulah-e-KHusrawana mangta hai

mera har ek munafiq yar mujh se

KHulus-e-dostana mangta he