maslahat ka chaar-su tezab hai

maslahat kā chār-sū tezāb hai

kaun kis ke vāste betāb hai

aap ulfat se koī sairāb hai

aur koī māhī-e-be-āb hai

chashm-e-qātil aaj jo pur-āb hai

vo merī tahzīb kā ik baab hai

tāq-e-nisyāñ par dharī haiñ ḳhvāhisheñ

dil kalām-e-pāk kī mehrāb hai

mauj-e-ġham pahuñcheñ-gī un tak bil-yaqīñ

ġham ke dariyā meñ agar sailāb hai

hijr meñ bhī hai vafā kī raushnī

ābrū-e-ġham hai ruḳh pur-āb hai

chāñdnī se us kī raushan roz-o-shab

āsmān-e-dil kā jo mahtāb hai

tishnagī ke ḳhuun ne sīñchā use

gulshan-e-dīñ dā.imī shādāb hai

zaat kā jhagḌā jahāñ se miT gayā

jāgtī āñkhoñ kā 'maḳhfī' ḳhvāb hai

maslahat ka chaar-su tezab hai

kaun kis ke waste betab hai

aap ulfat se koi sairab hai

aur koi mahi-e-be-ab hai

chashm-e-qatil aaj jo pur-ab hai

wo meri tahzib ka ek bab hai

taq-e-nisyan par dhari hain KHwahishen

dil kalam-e-pak ki mehrab hai

mauj-e-gham pahunchen-gi un tak bil-yaqin

gham ke dariya mein agar sailab hai

hijr mein bhi hai wafa ki raushni

aabru-e-gham hai ruKH pur-ab hai

chandni se us ki raushan roz-o-shab

aasman-e-dil ka jo mahtab hai

tishnagi ke KHun ne sincha use

gulshan-e-din daimi shadab hai

zat ka jhagDa jahan se miT gaya

jagti aankhon ka 'maKHfi' KHwab hai