masrufiyat mein aaj bhi guzra tamam din

masrūfiyat meñ aaj bhī guzrā tamām din

rahnā paḌā hujūm meñ tanhā tamām din

kahne ko ek bhiiḌ sī maujūd thī vahāñ

lekin thā saath bas mirā saayā tamām din

tark-e-vafā ke baad pashemāñ sī vo nazar

bhūlā tamām raat na bhūlā tamām din

milne kā tum ne aaj kahā thā mujhe magar

sūraj to aaj bhī nahīñ niklā tamām din

vo jā rahā thā Dhalte hue saa.e kī tarah

chāhā to maiñ ne thā ki vo rahtā tamām din

thoḌā sā raushnī ko añdherā bhī chāhiye

dekho sitāra koī na chamkā tamām din

'ādil' maiñ raat bhar to pareshāñ rahā magar

raushan hue darīchoñ meñ ghūmā tamām din

masrufiyat mein aaj bhi guzra tamam din

rahna paDa hujum mein tanha tamam din

kahne ko ek bhiD si maujud thi wahan

lekin tha sath bas mera saya tamam din

tark-e-wafa ke baad pasheman si wo nazar

bhula tamam raat na bhula tamam din

milne ka tum ne aaj kaha tha mujhe magar

suraj to aaj bhi nahin nikla tamam din

wo ja raha tha Dhalte hue sae ki tarah

chaha to main ne tha ki wo rahta tamam din

thoDa sa raushni ko andhera bhi chahiye

dekho sitara koi na chamka tamam din

'adil' main raat bhar to pareshan raha magar

raushan hue darichon mein ghuma tamam din