masrufiyat usi ki hai fursat usi ki hai

masrūfiyat usī kī hai fursat usī kī hai

is sarzamīn-e-dil pe hukūmat usī kī hai

miltā hai vo bhī tark-e-ta.alluq ke bāvajūd

maiñ kyā karūñ ki mujh ko bhī aadat usī kī hai

jo umr us ke saath guzārī usī kī thī

baaqī jo bach ga.ī hai masāfat usī kī hai

hotā hai har kisī pe usī kā gumāñ mujhe

lagtā hai har kisī meñ shabāhat usī kī hai

likkhūñ to us ke ishq ko likhnā hai shā.irī

sochūñ to ye suḳhan bhī ināyat usī kī hai

dar-e-āstāñ koī ho ba-zāhir sar-e-sujūd

lekin pas-e-sujūd ibādat usī kī hai

vo jis ke haq meñ jhūTī gavāhī bhī maiñ ne dī

'rūhī' mire ḳhilāf shahādat usī kī hai

masrufiyat usi ki hai fursat usi ki hai

is sarzamin-e-dil pe hukumat usi ki hai

milta hai wo bhi tark-e-talluq ke bawajud

main kya karun ki mujh ko bhi aadat usi ki hai

jo umr us ke sath guzari usi ki thi

baqi jo bach gai hai masafat usi ki hai

hota hai har kisi pe usi ka guman mujhe

lagta hai har kisi mein shabahat usi ki hai

likkhun to us ke ishq ko likhna hai shairi

sochun to ye suKHan bhi inayat usi ki hai

dar-e-astan koi ho ba-zahir sar-e-sujud

lekin pas-e-sujud ibaadat usi ki hai

wo jis ke haq mein jhuTi gawahi bhi main ne di

'ruhi' mere KHilaf shahadat usi ki hai